Fjöl­skyldur

Safnið býður upp á fjölbreytta dagskrá fyrir yngstu gestina þar sem myndlistin er skoðuð í gegnum leik, sköpun og forvitni.

Reglulega er boðið upp á fjölskylduleiðsagnir, listasmiðjur, viðburði og námskeið sem gefa börnum og fullorðnum tækifæri til að skoða saman myndlist í rólegu og skapandi umhverfi. Í öllum safnhúsum má finna sérstök barna og fjölskyldurými þar sem hægt er að staldra við, skapa og njóta samveru.

Kjarvalsstaðir

Í austurenda Kjarvalsstaða er Hvammur, hlýlegt barna- og fjölskyldurými þar sem gestir á öllum aldri geta sest niður og notið samveru. Þar má skoða bækur, teikna og vinna með fjölbreyttan efnivið sem hvetur til forvitni og sköpunargleði.

Hvammur er jafnframt vettvangur fyrir fjölbreytta dagskrá fyrir börn og fjölskyldur. Þar eru reglulega haldnar listasmiðjur, barnanámskeið og fjölskylduviðburðir tengdir sýningum safnsins. Í Hvammi geta börn og fullorðnir upplifað myndlistina saman, rætt það sem fyrir augu ber og prófað sig áfram með eigin hugmyndir. Hægt er að neyta veitinga í Hvammi, bæði eigin veitinga og frá veitingastaðnum á Kjarvalsstöðum, Klambrar Bistro, sem gerir rýmið að notalegum stað til að staldra við og njóta safnheimsóknarinnar.

Hafnarhús

Á neðri hæðinni í Hafnarhúsi er að finna notalegt rými fyrir börn og fjölskyldur. Þar er fjölbreyttur efniviður sem hvetur til sköpunar og leikja og gestum gefst kostur á að vinna með eigin hugmyndir og skapa sín eigin listaverk.

Þar geta gestir á öllum aldri sest niður saman í rólegu umhverfi. Viðfangsefni og efniviður tengjast gjarnan þeim sýningum sem standa yfir í Hafnarhúsi og gefa börnum og fjölskyldum tækifæri til að nálgast samtímalist á skapandi og aðgengilegan hátt. Á fimmtudögum er opið til kl. 22 í Hafnarhúsi og því tilvalið að njóta skapandi samveru fram á kvöld.

Ásmundarsafn

Í Ásmundarsafni er Undraland, skapandi fjölskyldusmiðja innblásin af verkum Ásmundar Sveinssonar.

Á Ásmundarsafni er hægt að finna leyniskúffu, en í henni er að finna alls konar liti, bækur, leir og skapandi efni sem hægt er að vinna í með frjálsri aðferð. Í Ásmundasafni er líka alltaf heitt á könnunni fyrir fullorðna fólkið.